NINIKI LONIK LOGONET, NINIKI NDEEGENGGOLOGO LOGORAK WONE
Iyalok wone. Kwe ambi aap miike nagatik, yarak me niige logonet a, yi eekak-ndi eekak eeke logonet a, we puk logonet a, iniki nogo ti aap miremegerak nogo paga mban lonik wonagatik, lambumbugwi iinok, imbirak wonage logonet perak iniki lonik logomenggerak nogo mari age menggerak o.
Kiwone. 2 Peterut 3:16.
“Ninowe mbet-mbet waga’lek kenok ti, nit abok ninagap ndaruwak nduk to’niige me, niniki ndegenggologo logorak nanonggwan aret o,” yinuk, mbako logobagip nduk, liiru yi, mbanggiragi o..
Niniki lonik logorak Wone alom 3 aret o.
1. Hari Minggu paga niniki lonik logorak wone
2. Yi hari-ndi hari ninniki lonik logorak wone.
3. Mbugut paga noorak niniki lonik logorak wone.
I. Hari minggu paga niniki lonik logorak wone. Mark 16:2
1. Kubondok mi’nanuk tamban eeriyak.
2. Jam 6 paga mbuku pikkoorak.
3. Jam 7 nggu’mo wari noorak.
4. Jam 8 Gerejana paga woroorak.
5. Tamban eekwi, ndawi yogwe, Ala wone yogwe, eekwi iigak, niniki mbininggolage logorak.
6. Minggu abu eeppunuk niname noorak.
7. Niname nanuk, Yi eekak-ndi eekak eeriyak mage, Ala wone yo'niramenggaarak nogo mban niniki mbininggwi, Mbuku Lunggwi, Mbi-mbingga laroogo nunggwi, eekwi we puk aret logorak.
( Wak. 2:3 ) 3 At Ala nen yi mendek ndi mendek abok aret wakkage nagagerik, ne ambi 7 paga tat yonggonggolage puk wonagagerak me, ne ti nogo at ale’nggen mbake logonet, ake leenogo pateegerak.
(Wunde 16:29-30 ) 29 Naliku an ALA nen nogo 6 yinuk, ko’lu paga kit yonggonggologo logonet, nalut eeko logomunggup nduk, wokkiragagirak me, Ne 6 paga ti, mbi ne mbere noorak ake wo’nirage logogin o, yinuk, liippogo logonet, ko’lu ti paga kit ambit nen endekem wundi naga’lek kiname mban aret puk logomunggup o.” 30 Yorage mbareegi, it aakumi Iterali nogo 6 yippunuk, ko’lu paga yabu eeka’lek tat yonggonggologo nogogwaarak.
( Wunde ( 20:8 ) Nogo 6 yippunuk, ko’lu ti, nake leenak aret me, abeko logonip o.
Wunde. (31:13 ) “Aakumi Iterali yoroorak nogo yi aret. Nogo 6 yippunuk ko’lu paga ti, an nake leenogo pateegirak me, it nen mondok liirogon abeko logonet, nayuk wuko logowak o.
Wunde. (31:14) Aap ambi nen nogo 6 yippunuk, ambi 7 nake leenak ti paga taganogo punuk, yabu eeke kenok, at eeremenggerak nogo onggo kambuurak aret me, aap ambi nen nogo 6 yippunuk, ambi 7 nake leenak ti paga yabu eeremenggerak kenok, owe-awot inenggela’me nen enggaawak lek eerogo pogo logowak o.
Wunde 31:16-17) 16 Togop aret me, nogo 6 yippunuk, ko’lu 7 ti, it nen mondok-mondok aberak logowak nduk koonogo pereegirak me, it inapuri ndaganabit wundi woramenggaarak inom inale’nggen nen abeko logonet, nayuk wuko logowak o. 17 An inom, aakumi Iterali inom, mondok-mondok abeko logowok nduk, Naliku an ALA nen ne 1 nen nok ne 6 kuli mbogut-nggween wakkage nagagirik, ko’lu paga yabu eeka’lek we puk tat yonggonggolage wonagagirak nogo it aberak wonogwe iinok, an it ninom niniki kunik wonogwe neenu arigin, yegerak, yoret o,” yinuk, yoreegerak.
Ala Unde 19:3) Naliku inogoba Ala an aret me, inalitak lombok nen inagalomini-inogobamini inayuk wukwi, ndi, nogo 6 yippunuk, ko’lu paga yonggonggologo logorak nake leenogo pateegirak nogo liirogon aret abekwi, eeko logowak o.
Ala Unde (19:30 ) 30 Naliku ALA an aret me, nogo 6 yinuk, ko’lu paga yonggonggologwe puk logowak nduk, leenogo pateegirak nogo abekwi, nawooliya wurik magame nogome ayuk wukwi, eeko logowak o.
Ala unde ( 23:3 ) Ne 6 paga ti, yabu eerit nogo logorak op aret kwe, ko’lu paga perak, an nake leenogo pateegirak me, it iname lombok abok aret yabu eeka’lek tat yonggonggologo logonet, kuwak eeppunuk, Naliku ALA nalut ee’nako logowak o.
Ala unde ( 23:32 ) Ne ti eyom ti, nogo 6 yippunuk, ko’lu paga yonggonggologo logorak nogo aret me, kit kinambe mage negen logonet, yabu eeka’lek tat yonggonggologo logomunggup o.
Ala unde 24:7-9 ). Oroti ti, nogo 6 yippunuk ko’lu tat yonggonggologwe puk logorak ti eyom paga Naliku ALA nenggaanom paga pani wagak eeko logowak nduk, koonogo pigirak me, it aakumi Iterali mendek nen mondok aret eeko logowak, yegerak, yoret o,” yinuk, yoreegerak.
Ala unde (26:2 ) Naliku ALA an aret me, nogo 6 yinuk, ko’lu paga yonggonggologwe puk logowak nduk, leenogo pateegirak nogo abekwi, ndi, nawooliya wurik magame nogome ayuk wukwi, eeko logowak o.
Ala wone mbanak paga togop aret yo'nirage me, Hari ambiret nogo 6 yippunuk, ko’lu ne 7 nogo ti, Aliku Ala ake leenogo pategerak me, nit mondok ayuk wuko logonet, Tamban eeppunuk we oome puk logonet, “Ala wone mban” niniki abekwi niigak nok o kip ari noorak kuli aret arinoorak o.
II. Nit Abet mbareegurak nogo, Yi ari-ndi ari ninniki lonik logonet, ndegenggo logorak wone
( Setiap Hari peperangan Perlawanan dengan Iblis )
Pengharapan Menjaga Iman Kami masing-masing.
Iyalok wone. Kwe ambi aap miike nagatik, yarak me niige logonet a, yi eekak-ndi eekak eeke logonet a, we puk logonet a, iniki nogo ti aap miremegerak nogo paga mban lonik wonagatik, lambumbugwi iinok, imbirak wonage logonet perak iniki lonik logomenggerak nogo mari age menggerak o.
Kiwone. 2 Peterut 3:16.
“Ninowe mbet-mbet waga’lek kenok ti, nit abok ninagap ndaruwak nduk to’niige me, niniki ndegenggologo logorak nanonggwan aret o,” yinuk, mbako logobagip nduk, liiru yi, mbanggiragi o.
Niniki lonik logorak Wone alom 3 aret o. = Pengharapan beriman dalam Yesus.
1. Hari Minggu paga niniki lonik logorak wone
2. Yi hari-ndi hari ninniki lonik logorak wone.
3. Mbugut paga noorak niniki lonik logorak wone.
1. Hari senen kubondendok nen nok kiyoma ari noorak kuli niniki ndegenggologo logorak.
2. Nogo yikit nduk, kubondok nen nok kiyoma kuli niniki koonggirak inom, wone mbanggirak inom, ti nogo abok aret cek eeppunuk op mban aret koonggirak, yagarak kenok, Ala unde wa’nakendak wa! Yunuk, keyage wake logonet, tamban eeppunuk, nogo yurak.
3. Ti’nuk, ko’lu kubondok neenik a’nuk, tamban eeke logonet, yogondak kubondok nen nok kiyoma kuli niniki kooniyak inom, wone aakumi ninom nonggop mbaniyak inom, kat nen "unde wa’nabumugun o," yinuk, tamban eeriyak.
4. Ti’nuk, Onikiya nogo yikit nduk, Kubondok kuli nen nok kiyoma jam ti kuli nogo, niniki konggirak inom, wone mbanggirak nogo inom, Nanegen paga inom, Naruk Paga inom, nonggop mban eekirak nogo iniki mbinimbunuk, op mban konggirak a, ando maluk konggirak a, nogo cek eeriayak. Op mban kenok, “Ala Aberiniki unde wa'nakendak wa!” yinuk, tamban eeke logonet keyage wariyak. Keyage abu wappunuk nen nogo yurak.
5. Minggu ambi anikime Hari senen kuli nen nok hari Sabutu kuli op mban aret ndegenakerak kenok, Ala alut ambik eeriyak.
6. Togop mban eerit nage negak kuli nok minggu ambi anggwi noorak. Ti’nuk mbulan ambi anggwi noorak. Ti’nuk, Tahun eeri noorak. togop mban eerit nogwe niigak, Tahun ambi anikime apit op mban aret eerit nogoorak kenok, Ala alut ambik eeko logonet, ninale’nggen eekologolorak. Ata, Ninale’nggen mbariyak Mondok iya!
7. Ti eerit nogwe ninok, Ala nen yi paga-ndi paga ninabut mbaniyak nogo ambik wonage o. Iniki nu’lek wonage kamun a, iniki ndeyak wonage kamun a, yinuk, ninabut mbanigin me, nit niniki mondok wakkangget logonet, wone yi eerit nogo logoorak o.
Nano nduk nit togop eerit nogwe nigak Yetut wa’ninabi wage logomigirik, nit keyage warogo wa’ninabigin mbakop? Eebe mbuku yi.
Nano nduk, Nit setiap hari niniki ndegenggologo logorak?
Mengapa setiap taat menjaga Kekudusan Iman kita?
Epetut.5: 26-27 Nit Ala apuri yi awi ndi awi monggoorak ninake kambeegerak nogo ti, “An napuri inoba mili lenggenak yinik-pinik aago ineebe yinuk-punuk eerak iigak koloorak neebi o. Ata, ineebe kikak naka’lek mondok alik leenak abe kigirikwe lombok iinok kolaakit o,” yinuk, ngguu’mo wappiigo mengga kwak, at oone waganggwi paga ninomaluk lek eerogo pinanege logomenggerik, Ala ake leenak logowok nduk, ninabuwa mbake logonet, ninake kambeegerak o.
I Pet 1:15-16 At Ala nen ari logonet, “An maluk eekeelik alik leenak minggirak ndak-ndak, kit togon maluk eeka’lek alik leenak togop aret logonip o,” yinuk, yereegerak wone liiru mbanak wonage me, at Ala maluk eekeelik alik leenak menggerak nogo nen kinayonggo pereegerak me, kit togon maluk eeka’lek alik leenak logonet, eerit nogo logonip o.
Ala Unde 11:44 An niniki kikak nakeelik abu obeelom minggi kwak, it togop aret iniki kikak naka’lek abu obeelom an nake leenogo patinuk logowak o. 45 An inogoba Ala aret logokit nduk, it o Metit nen wogoren wundi wagagirak Naliku ALA an aret me, an niniki kikak nakeelik abu obeelom lombok minggi kwak, it togop aret logowak o.
Matiyut ( 5:8 ) It aakumi iniki kikak naka’lek obeelom mban menggaarak nogo ti, Ala inigen kaagun aret me, Iniki ale’nggen aret mbako logowak o.
Wayu 22:11)..... “Ndi, it ando kikak naka’lek Ala ake leenak mban logowok mbakwi kenok, Ala ake leenak wonogwe, eeko logowak o. yinuk, yo’nirage agarik.
B. Wayu ( 19:8 ) inoone yogwe iigak, akwe nogo wage mbaki, ayum ambi abu yawenak kikak naka’lek abe laambu yanggwi negen lan aago yikkolawak nduk, wogoge kagarak. Ndi, ayum abe yawenak nogo ti, it Ala apuri ake leenak nen maluk eeka’lek obeelom mban eerit nugwi nogo kwak aret kagarak.
Alom ti paga nit netik-netak niniki-ninoone ndegenggologo logorak.
Bagimana cara Kekudusan.? 2 Peterus 3:14
1.Menjaga setiap Detik. Detik paga jaga eeriyak.
2. Menjaga Setiap Menit. Menit paga Jaga eeriyak.
3.Menjaga setiap Jam. Jama ambi anikime Jaga eeriyak.
4. Menjaga setiap Hari. Ari anikime Jaga eeriyak.
5.Menjaga setiap Mingu. Minggu ambi anikime Jaga eeriyak.
6. Menjaga setiap Bulan. Tut ambi anikime Jaga eeriyak.
7.Menjaga setiap Tahun. Taun ambi anikime Jaga eeriyak.
Yi nit Ninomaluk Nggaruk togon mbo punuk, Abet mbako nogogurik, Yetut ninikime waganggo mbareegu, Aberiniki ninikime mondok-mondok puk ari nggwagagerak wonage nogo nen eerit nogo logorak nduk mbanak.
Ndi, kit ando Kinomaluk nggaruk togon mbo punuk, Yetut kinikime wagangga’lek kenok ti, Anduk kiniki nggaruk togon Kinomaluk mbo punuk, Yetut abet mbakwi, kinikime waganggwi eeppunuk, langka kedua ti, Abet mbakoorak nogo ndegenggo logorak yi eeriyak o.
III. Mbugut paga noorak niniki lonik logoorak wone. Pilipi 3:20
Nit yime we nggiru negen wonogwe.
Ninawi ninawarak mbugut paga wonage.
1. Ninagabulo ngget yirippininaigin.
2. Ninawi ngget wa’niraagin.
3. Nineenik mondok-mondok logogun.
Ninawi logorak mogonak nogo eebe yi aret o:
1.Mbugut paga anikime logoorak.
2.Yagat andiken logoorak.
3. Kanimonuk me logoorak.
Mbugut paga anikime logoorak niniki lonik logorak:
Wayu 22:14
“It inambogoyum laambu kookkologo menggaarak nogo, Eyo ineenik aganaka anggen nunggwi, ndi, o kota tu paarak mban wonage yime nowagam unggwi wogwe, eeko logonip o, yinuk, yorage neenok, iniki ale’nggen mbakak o kota unggwi nogwe iigak kwe,... (Inambogoyum kuluk kookologo menggarak nogo ti eebe, yi ari ndi ari niniki Mili lenggenggolokwak nduk, ndegenggologwe ti aret nduk yeregerak o, norewi.
Mbugut paga anikime Yerusalem Baru logoorak nogo ninaneebenu 4 yi o:
1. Ala Yetut, Aberiniki.
2. Ala ayonggo nugu menggaarak Malaikat mendek.
3. Inanebenu Iterali mendek abet mbakwi nogo logoorak.
4. Nit aakumi andeken mendek Ala wone abet mbako nogogurik, ndegenggo monggoorak nogo. Ninanebeenu 4 ti aret niname mbugut paga Yerutalem Baru nogome Ninogoba ALa Ninowe Yetut ninom nineenik mondok-mondok aret logogun.
Yagat andiken logorak nogo it Muk abet mbako nogogwaarik, maluk yi mendek eeko menggaarak kenok logogun o:
Wayu 22:15, 19.
1. It nggeewo pogom eeko menggaarak inom, =eebe kumi agun-agun eerinabit nugwi.
2. Magagirak iyagalo inom,
3. yawukak mbabilu inom,
4. aap inooka inom,
5. kugi eeka inom,
6. ndi, yi aap ndi aap pilit puguniyak inikilom mbako logonet, pilit-pilit pugungga inom, it perak, o kota time unggwi naga’lek yagat endekem logogun o.
7. Epetut 5:3-5 Kit Ala apuri ake leenak aret kagak, kumi ugun wurinabit nugwi,
8. kiniki kumi paga mban lunik logonet, ugun-ugun eerit nugwi,
9. uugweu-ugwe mbakwi, eerit nugwi kiinok, it aakumi ando nen, “Ala apuri aret kwe, maluk eekwi iyaanip o,” yinuk, kinombakwi.
10. Kumi inabok mban agan nugwi, elege negen ugun i’ndok kambuurak mban agan nugwi,
11. iniki kumi paga mban lunik logonet, inoonewak agan nugwi,
12. It kumi ugun wurinabit nogo menggaarak inom,
13. iniki kumi paga mban lunik logonet, inabok agan nugu menggaarak inom,
14. ndi, it uugwe-uugwe mbakwi nogo ti, aap kugiwak alut eekwi ndak-ndak aret me, it ti inom, it aakumi 14 kuli ti eeko menggaarak abok aret Ala Keritut imbirak inabu’me piigo menggam unggwi nagun mondok lek mbako logonip o.
Wologogowae! It Yagat andike logorak yi taamuni mbakop noreewi? Lek o. It Ala wone abet mba’nuk, tahun ne mande negen eeke kagak, Ala wone mugurok nogo logomenggaarak kwe, ne ambi Tile nen, 14 nomor lingginik yi paga inabut mbangge kenok, eebe aret eekwi ti paga, mbugut paga anikime logoorak nogo lek eerogo pako menggarak me, yagat andeken aret logogun o, Ala Keritut imbirak inabu’me piigo menggam unggwi nagun mondok lek mbako logonip o. Noreewi.
Kani omonuk me logorak nogo it aakumi yi mendek eeko menggaarak kenok aret logogun o: ( Wayu 21:8 )
1. It Ala wone mugurok noorak inagabiti mbaka inom,
2. Abet mbariyak ineebi mbaka inom,
3. maluk peyak wurik kagak ugun eerit nega inom,
4. aakumi inooka inom,
5. kumi ugun wurinaka inom,
6. magagirak iyagalo inom,
7. kugiwak amili kungga inom,
8. pilit pugungga inom, it abok aret it logowam pipuk eerogo pereegim kani
9. omoonuk wunuk mban ari menggim nogome mbo nappiyaagin o.
Aa’nduk ineenik logonuk, kambemenggaarak kwe, kani omoonu’me nappiyoorak nogo ti, peebi ne ambi kanggwi nogo kokwak aret o,” yinuk, yo’nege kagarak.
Noreewi wai, It kani omonuk me norak inom, it yagat andiken logorak inom, maluk eendage abu ndak-ndak aret wonage kwe, it kani omonuk me nagun yi alom ngge paga mbakop? Lek o. It kanimonuk me nagun nogo ti, alom nomor ambire
1 It Ala wone mugurok noorak inagabiti mbaka inom,
2 Abet mbariyak ineebi mbaka inom,) nomor ambire ti imbirak eerulik paga aret nappiyagin o.
It yagat andiken piyagin kogorak nogo ti maluk atinggen ndak-ndak aret eekaarak kwe, it alom muk abet mbareegwaarak kwe, maluk eerit nagaarak ti paga aret yagat andiken pengge agan nugu logowak nduk, Ala nen wumbiyagin o.
It Kanimonuk me logorak nogo inanebeenu 4 yi aret logogun o:
1. Kepala Tile nogo aret logogin o.
2. At awuri Melaikat Maluk mendek at tiyappogo mbaregwa inom wuppiya wagagerak nogo logogun.
3. Inanebeenu Iterali mendek abet mbakalek kenok logogun.
4. Aakumi o nggwen paga wonogwe Yetut Ninake kangge nagagerik abet aret eenik aa’nuk mi’nage nagagerik, abet aret eenik mbogut paga laganegerak nogo abet mbaka’lek nogo mendek aret logogun o. It inanebenu 4 ti aret logogun o.
Abo mbangge wone :
Nit Niniki lonik logomundak nogo, ninogonggelo Yetut nen wa’ninabi wage logominggirik, wa’niren mbogut paga Yerusalem Baru anikime pinani nage kenok, ninom nineenik mondok-mondok logonet, niniki lonik logomundak nogo lek age logonet, obaani’me, niniki ale’nggen mban aret, Ala Yetut ineenik initok menggarak pugum aret logogun o.
Ambokan time nen niniki lonik o alik me noorak ambi aberak logogun mondok lek aret o. Ata, Logorak kuli Ala nen koonegerak ti kuli abu aret o. O wege o kiip age eeka’lek, o Liingge eya mban aret logogun o. Ndi, o eya eeke nogo ti, at Ala eebe nen aret eya eeppunuk wonage kagak, nit at abu’me Guna’me o wiya nabuk-nabak eeke kagak ko’ndak menggaa kwak, Ninogoba Ala abu’me logonet, ninali’nggen mban aret wonogo logogun o.
Eyo anggen aakumi ineenik aganake menggerak inom, Niyo aakumi ineenik aganake menggeerak inom, ti nunggwi niigak, Niniki koonage menggeerak alom inom, Andi-pandi ee'ninake menggerak alom inom, niniki Puuru ari menggeerak alom inom, abok aret kinogo wumbege logominggirik, obane'me, nineenik ninitok Ala menggeerak ndak-ndak aret eerogo pinanemenggerak me, ninale'nggen mban awimban logogun o. Haleluwiya.
Togop aret me, norewi wa. Nit ninalitak lombok aret, niniki lonik ko’lu-ki’me niniki ninoone inom, ninobaabut inom, ndegenggologwe, yi paga ndi paga ninabut mbani wage kagak, niniki mondok nu'lek wakka’ngget logonet, ndegenggologwe, eeko logowok o.
Togop eeko logonet,
1. aakumi abok aret inabuwa mbakwi.
2. Niniki kunik aganako logonet, obeelom eeppiinet nogwe,
3. Ala wone lenggenak eeriyak yogwe iinok niniki abeelom paga eerit nogwe,
4. At ambi iniki Tebenak wonage kenok eyak wappegak eekwi,
5. Yenggwa-yenggwa eekwi, Aakumi abet mbaka'lek nogo abet mbaruwak nduk, Ala wone Lik-lak mamunirogwe,
6. It muk abet mbakarak kenok, Iniki ndegenggologo logorak mendek mamunirogwe, eeko logowok o.
Ala wone mbanak Wakkagagerak kuli nen nok Wayu kuli abok aret anikime lambuk togon eeriyak nogo ti, yi aret me, An inom kit inom, ninom ndak ndak aret eerit nogo logowok nduk, An Yusman B Enumbi nen Aberiniki niniki eyak wappanege kagak, Liiru yi mbanggi o. Noreewi Yetut paga kunik wa! Amin.!
Ala inom, aakumi inom, Niniki kunik eeko logorak kiwone mbanak yi o.
Pelaareegerak 6:5 Kiniki inom, kineebe inom, kinogoba Aliku kinogoba Ala mban kiniki kunik eeko logonip o.
Matiyut 6:3 Kit perak kinamendek aakumi ineenggi lek mendek wagarogo logonet, “An nageerok aakumi ndogop wogoragarak o,” yinuk, it kinom wonogwe nogo mbininogo yoraagup o.
Matiyut 7:12 It aakumi nen ndogop eeppinanuwak lak awo, mbako monggotak nogo ndak-ndak aret eeppigo logonip o. Ala wone lenggennak inom, It Ala wone aanduk yorogonogogwaarak inoone yugu inom, eebe ti aret me, eeko logonip o; yinuk, yoragagerak.
Yaya 13:3 An nen kit niniki kunik eekkinake minggikwak, kit togop aret niniki-kiniki kunik eeko logonip o.
Nappiyaareegerak 4:32 It abe t mbareegwaarak nogo, iniki ambit eeppunuk logonet, yi mendek ndi mendek, “Yi kat mendek o, yi an mendek o, yagalek, “Nit abok ninamendek aret o,” yogo nogogwaarak.
1 Korindut 13:13 Ti kenok, niniki abet mbakwi inom, niniki lunik wonogwe inom, aakumi inabuwa mbakwi inom, wone alom kenagan wonage kwe, nabuwa-kabuwa mbakwi ti perak, mondok tiyanak aret wonage o.
2 Korindut 9:10-11 Aakumi inabuwa nen kinamendek wogorogwe kiinok, Ala nen obeelom eerogo pinagaage, kiniki ndobu logonet, aakumi iinake nggwok aret kuwak eekwi paga, Ala nen kineenggi warak eeppinagage logogin o.
1 Timotiyut 5:18 It aap yabu eekwi nogo, yabu eekwi onggo wogororak ti op aret o.
Epetut 5:2b Nabuwa-kabuwa mbako logonet, at ambi obeelom eeppegak eeko logonip o.
Pilipi 2:3 “An perak meek, ndi, nore ti perak, iya o,” mbako logonet, eeppigo logonip o.
Kolote 3:18 Kit kumi yi wae. Kit Ala apuri aret me, kinogonggelomini inabu’me logonet, inoone liirogon koneenggo logonip o.
Iberani 6:10 Ala apuri yenggwarogo nogogutak inom, inom, yogondak awo yeenggwaarogwe inom, at mari arigin lek o.
Iberani13:1 Kit Keretut kinom kunik wonogwe me, nabuwa-kabuwa mbakwi nogo lek age kero, liirogon arumwakko logonip o.
Iberani13:2 It aap mande negen nen, Ala ayunggo Melaikat mendek ineenggolek logonet, inabugo lareegwaarak me, aakumi nggiru kiya wogwe iinok, keyage warogo kiniki ale’nggen paga waganako logonip o.
1 Petirut 1:25 Kiniki lakot paga, kinoreewi Ala apuri kiniki kunik aganako logogup o. Ata, kiniki abe paga aret, kinoreewi kinom, niniki-kiniki kunik eeko logonip o.
1 Petirut 4:9 Kinoreewi ambi kiya wogwe iinok, kineebi mbarugup o, Ata, kiniki abe paga kinambi magarogo logonip o.
1 Petirut 5:14 Kit-kit aret kiniki kunik paga keyage wat-wat yogo logonet, linggik-kambuk yogo logonip o.
1 Yaya 3:17 Aap ambi eenggi warak nogo nen, ore ambi aninggin oba agarak enegen kage logonet kwe, “At obalombok o,” yinuk, iniki nggilimi wonage kenok, Ala nen aakumi inabuwa mbake menggerak nogo mendek inikime wonage abu lek o.
1 Yaya 3:18 Napuri o, Ninoone pagan en mban aakumi ninom niniki kunik wonogwe yuurak mage o. Ata, niniki paga nen aret inabuwa lombok mbako logonet, obeelom eeppigo logowok o.
1 Yaya 3:22 Nit Yi mendek ndi mendek wo’nirawak nduk, nggino yogwi ninok, at nen wo’nirage logogin o.
Yaya 15:4 Kit an ninom kunik, ndi, an kit ninom kunik logowok o.
7 Kit an ninom kunik logonet, an noone kinikime wonage kenok, Nit ndi mendek wo’niraawak, mba’nuk, nggino yo’nugwi kiinok, ti aret wokkirage neyaamunggup o.
8 Anggen ambik yi’nogo logomonggotak paga kit abet aret an noone waganggwi mendek kiyaagun me, ti paga an nogoba endage tiyak yigin o.
9 Nogoba nen iniki kunik ee’nabeegerak kwak, an kunduk togop aret niniki kunik eekkinabeegerak o. Ndi, an niniki kunik eekkinabeegirak me, ninom kunik aret logonip o.
10 Nogoba nen, Yogop ee’nu, ndogop ee’nu, yo’nereegerak nogo an eeke nagagirak paga iniki kunik ee’nabeegerak nogo kwak, an nen, Yogop ee’nu, ndogop ee’nu, yokkirage nogo eekwi kiinok, niniki kunik eekkinabigin me, ninom kunik aret logomunggup o.
16 Kit nen an mii’nabulik o. Ata, an nen aret kit miikkinake nagagirik, kit anggen ambik mondok logorak mendek yi’nogo logobagip nduk, leenogo pinagareegirak o. Ti eerit nugu logonet, Ti mendek wo’niraawak o, yinuk, an nendage kumbunuk nogoba nggino yogwi kiinok, at nen wokkiraagin aret o.
17 Niniki-kiniki kunik eeko logobagip nduk, wone ambit ti aret yokkiragi o,” yinuk, yoragagerak.